Andrew Holland banduna Pro Helvetia
Andrew Holland, directur da la Fundaziun svizra per la cultura Pro Helvetia dapi il 2012, demissiunescha per la fin d’avrigl 2017. Suenter avair lavurà totalmain dudesch onns per Pro Helvetia è Andrew Holland sa decidì per motivs persunals da bandunar la fundaziun.
Andrew Holland surpiglia la direcziun da la Fundaziun svizra per la cultura Pro Helvetia –suenter l’entrada en vigur da las novas basas legalas – il november 2012. El maina cun success la fundaziun durant la fasa ch’ella s’orientescha da nov e durant il process parlamentar da la missiva da cultura 2016-2020. Suenter ch’el è s’engaschà dudesch onns per Pro Helvetia decida Andrew Holland per motivs persunals da bandunar la fundaziun avant che vegn instradada la nova missiva da cultura per la fin d’avrigl 2017. Fin là stat Andrew Holland a disposiziun a Pro Helvetia per uschia pudair garantir ina surdada senza difficultads da ses uffizi.
L’onn 2004 cumenza Andrew Holland a lavurar per Pro Helvetia sco manader da la partiziun Saut. Ils onns 2009 fin 2012 maina el il champ Promoziun ed è vicedirectur. Sco directur contribuescha Andrew Holland considerablamain a la realisaziun reussida da las novas incumbensas legalas sco p.ex. represchentar la Svizra a chaschun da biennalas internaziunalas u concepir la promoziun da la generaziun giuvna. Andrew Holland iniziescha l’avertura da la fundaziun en il sectur design e medias digitalas fin a la promoziun da l’economia e l’innovaziun, sa deditgescha a la diversitad culturala en las regiuns e dat ils impuls per amplifitgar la rait da posts exteriurs en Russia ed en l’America Latina.
Pro Helvetia deplorescha fitg la partenza dad Andrew Holland ed al engrazia per ils gronds merits a favur dal svilup da la fundaziun. Per sia ulteriura carriera professiunala al giavischa Pro Helvetia bun success.
A chaschun da la seduta ordinaria dals 30 da november 2016 decida il cussegl da fundaziun davart il proceder ed il successur u la successura dad Andrew Holland.
La direcziun surpiglia ad interim a partir dal 1. da november 2016 Sabina Schwarzenbach, manadra dal sectur Communicaziun, en stretga collavuraziun cun ils ulteriurs commembers da la direcziun.
Persuna da contact per las medias:
Charles Beer, president da la Fundaziun svizra per la cultura Pro Helvetia
contact: charles.beer@bluewin.ch
Communicaziun a las medias da la Fundaziun svizra per la cultura Pro Helvetia, 31.10.2016
