Litteraturas multilinguas da la Svizra

Dapi l’onn passà resguarda Pro Helvetia en sia promoziun da la creaziun litterara texts en tut las linguas. Quai signifitga che er auturas ed auturs che na scrivan betg en ina da las quatter linguas naziunalas uffizialas pon inoltrar dumondas per ina contribuziun.

Duas auturas ed in autur raquintan en il video tge che questa nova pussaivladad munta per ellas ed el. Medemamain a pled vegn Reina Gehrig, manadra Litteratura da Pro Helvetia.

Davart las auturas e l’autur:

Dragica Rajčić Holzner è creschida si en Croazia. Suenter la matura ed in segiurn en l’Australia è ella vegnida ils onns 70 en Svizra, nua ch’ella ha lavurà sco nettegiunza e stirunza e fatg lavurs davent da chasa. Ils onns 80 è ella turnada en Croazia, ha fundà la gasetta Glas Kaštela e lavurà sco schurnalista. Durant las guerras en la Jugoslavia è ella vegnida en Svizra cun ses trais uffants ed è s’engaschada per la lavur a favur da la pasch. Dragica Rajčić ha cumenzà a scriver a l’entschatta dals onns 70, l’emprim en sia lingua materna. Dapi ses emprim segiurn en Svizra ha ella era scrit poesias, prosa curta e tocs da teater en lingua tudestga. Qua chattais Vus ina survista da sias ovras.

Hasan Sever è naschì en Tirchia. Anc durant ses studi da scienzas economicas a l’Universitad tecnica dal Proxim Orient (ODTÜ) ad Ancara ha el stuì bandunar sia patria il 1995 per motivs politics. Ses studi d’economia ha el cuntinuà a l’Universitad da Turitg. El è stà autur ed editur da la revista Öteki İsviçre (L’autra Svizra – DaCH). Dal 2010 fin il 2016 è el stà responsabel per la pagina-web e-hayalet.net cun temas da la politica, da la cultura e da l’art. Là ha el publitgà mintga di artitgels. Infurmaziuns davart sias ovras chattais Vus qua.

Michelle Bailat-Jones è naschida en il Giapun e creschida si en il nordvest dals Stadis Unids da l’America. Dapi il 1999 ha ella vivì per la gronda part ordaifer l’USA, ha studegià e lavurà en Frantscha e sin l’insla Kyushu en il Giapun. L’onn 2005 è ella vegnida a star en Svizra. Ella discurra franzos e giapunais ed è vi dad emprender talian. Ideas e dumondas che han da far cun la cultura, la lingua, la migraziun e la geografia inspireschan ses scriver e sia passiun per la translaziun. Sias ovras chattais Vus qua.

Dapli davart las litteraturas da la Svizra:

« L’extensiun da las contribuziuns a la creaziun litterara reflectescha la realitad sociala da la Svizra e tegna quint d’in basegn da la scena da litteratura. Vuschs novas enritgeschan la lavur litterara d’in pajais: autras linguas portan er autras tradiziuns da raquintar, auters motivs e stils. Igl è mo consequent e nairas uras da resguardar quai er en nossa promoziun. »

[Reina Gehrig, manadra da la partiziun Litteratura da la Fundaziun svizra per la cultura Pro Helvetia]