In ambient da lavur segir ch’è liber da discriminaziun e da mulestas e che promova la diversitad e l’egualitad da las schanzas: Pro Helvetia s’engascha per questas valurs fundamentalas, tant en sia gestiun interna sco er en sias activitads da promoziun ed en la collavuraziun cun partenaris.

Premissas per survegnir in sustegn

La fundaziun vul sustegnair il sectur cultural stgaffind cundiziuns generalas che duain garantir in ambient da lavur fair e respectus. Per quest intent ha Pro Helvetia formulà directivas davart la discriminaziun e mulesta. Quellas cuntegnan prescripziuns impegnativas e descrivan il proceder che vegn applitgà, sch’in cas da violaziun da la persunalitad, da discriminaziun, da mulesta psichica u sexuala en connex cun in project u in partenadi sustegnì da la fundaziun vegn annunzià a Pro Helvetia.

Questas directivas èn disponiblas en tut las linguas naziunalas sco er en englais e valan per tut las petentas ed ils petents sco er per las instituziuns partenarias en Svizra ed a l’exteriur. A partir dals 10 da matg 2023 duain questas directivas vegnir respectadas ed èn ina premissa per survegnir e per duvrar sustegns finanzials da Pro Helvetia. En il rom dal process da dumonda vegnan tut las petentas ed ils petents infurmads davart las directivas. Cun far ina crusch vegn confermà d’avair prendì enconuschientscha da las directivas e ch’ellas vegnan observadas. Er sch’i n’è betg en la cumpetenza da Pro Helvetia da far retschertgas u da persequitar penalmain las persunas, po l’annunzia d’in cas da discriminaziun u mulesta provocar ina procedura d’examinaziun u schizunt l’annullaziun dal sustegn.

In engaschament cuntinuant

Dapi il zercladur 2022 èn tut las activitads da la fundaziun suttamessas a directivas internas per proteger l’integritad persunala. Quellas valan tant per tut las commembras ed ils commembers dal persunal (en Svizra ed a l’exteriur) sco er per las giurias, la cumissiun d’expertas ed experts ed il cussegl da fundaziun.