Noss biros e partenaris en l’entir mund

Dossier >

Cahiers d’Artistes

Cahiers d'Artistes in Moscow © Grigory Matveev

Infurmaziuns

Josiane Imhasly
Fachspezialistin Visuelle Künste

Kontakt

Infurmaziuns detagliadas sin

cahiers.ch

Cun la Collection Cahiers d’Artistes pussibilitescha Pro Helvetia ad artistas ed artists svizzers empermettents l’ediziun d’ina emprima publicaziun monografica. A medem temp preschenta ella a las expertas ed als experts da l’art ed ad in public interessà las tendenzas actualas en la scena d’art svizra.

Pro Helvetia tscherna sin recumandaziun d’ina giuria mintga dus onns otg artistas ed artists che candideschan en il rom d’ina concurrenza publica. Las publicaziuns vegnan realisadas da las artistas e dals artists en stretga collavuraziun cun las auturas ed ils auturs, il biro da grafica, la chasa editura e Pro Helvetia.

Grazia a sia rait naziunala ed internaziunala e ses contact direct cun instituziuns procura la Fundaziun svizra per la cultura ch’ils Cahiers d’Artistes vegnian en ils mauns da curaturas e curaturs sco era da criticras e critichers da l’entir mund. Cun occurrenzas publicas animescha Pro Helvetia la discussiun davart il publitgar.

La Collection Cahiers d’Artistes è vegnida lantschada il 1984 da la Fundaziun svizra per la cultura e dat in’invista cumplessiva en la creaziun artistica svizra dals ultims 35 onns.

 

Archiv

En l’archiv èn tut ils Cahiers d’Artistes accessibels a moda digitala. Qua chatt’ins publicaziuns d’artistas e d’artists sco Fischli/Weiss (1985), Pipilotti Rist (1994), Valentin Carron (2004) u Claudia Comte (2014), cun texts da criticras e critichers sco Jean-Christophe Ammann (1986), Rein Wolfs (1999), Dorothea Strauss (2004) u Chris Kraus (2019). Enfin uss èn cumparidas var 160 publicaziuns. Ultra da quai chattais Vus sin la pagina-web ina glista da tut las artistas e tut ils artists che han publitgà in Cahier d’Artistes sco era da tut las auturas e tut ils auturs che han scrit in text.

Ils Cahiers d’Artistes èn vegnids realisads a l’entschatta sco ediziuns privatas, dapi la fin dals onns 1990 èn els vegnids edids da la chasa editura Lars Müller Publishers e dapi il 2006 vegnan els publitgads da la chasa editura Edizioni Periferia, Lucerna/Poschiavo. Per la concepziun è responsabel dapi il 2015 il studio da design e grafica Bonbon cun sedia a Turitg.

Empustaziuns

Las serias VI-XV (a partir dal 2006 fin oz) pudais Vus empustar tar Edizioni Periferia. Las serias precedentas èn per gronda part exaustas. Per ulteriuras infurmaziuns contactai per plaschair Josiane Imhasly.

 

Il matg 2021 cumparan otg Cahiers d’Artistes da las artistas e dals artists suandants:

Dorota Gawęda *1986 Lublin PL ed Eglė Kulbokaitė *1987 Kaunas LT, vivan e lavuran a Basilea

Dorota Gawęda ed Eglė Kulbokaitė èn lecturas passiunadas. Quai mussa lur project extendì YOUNG GIRL READING GROUP, cun il qual ha cumenzà il 2013 lur collavuraziun sco duo. Tenor l’autur Jeppe Ugelvig è lur art ina staziun d’emissiun per derasar lur istorgias. Las artistas fan diever da funtaunas multifaras, sa deditgond pli e pli a texts populars (p.ex. mitus folcloristics, istorgias da praticas magicas u actas da process cunter strias) e main al discurs academic dal vest. Las artistas tractan temas sco nossa relaziun cun la natira e la tecnologia, ma era dumondas da gender. Cun lur ovras multimedialas che cumpiglian ultra da performances e videos era savurs, installaziuns, sculpturas e fotografias, creeschan ellas purschidas per furmas alternativas da percepziun e da preschentaziun.

 

Dorota Gawęda ed Eglė Kulbokaitė, Cahier d’Artistes, 2021 © Dorota Gawęda ed Eglė Kulbokaitė / Bonbon / Pro Helvetia

gawedakulbokaite.com

 

Roman Gysin *1984 Möhlin, viva e lavura a Turitg

Roman Gysin è sa laschà inspirar per ses Cahier d’Artistes da la concepziun dals magazins da moda e d’architectura d’interiurs. Ina chaussa evidenta, sch’ins considerescha sia simpatia per decoraziuns e per l’estetica dal Camp orientada a l’exageraziun ed a la cultura dal mintgadi. A moda ludica entretscha Gysin maletgs da l’atelier cun vistas da sias ovras e cun fotografias fatgas dad el e rimnadas. Ils motivs ed ils ornaments da las fotografias entran en in dialog interessant cun las ovras che Gysin producescha sez cun grond inschign artisanal en ses atelier. Sylvain Menétrey va en ses text a la tschertga da la relaziun da l’ovra da Gysin cun il (post-)minimalissem e l’estetica da queer e mussa co che l’artist lomia senza difficultads ils cunfins tranter l’auta cultura e la cultura populara.

 


Roman Gysin, Cahier d’Artistes, 2021 © Roman Gysin / Bonbon / Pro Helvetia

romangysin.com

 

Andreas Hochuli *1982 Turitg, viva e lavura a Genevra

Andreas Hochuli preschenta en ses Cahier d’Artistes in catalog d’ovras cun sias picturas realisadas fin uss. In’installaziun da paraid digitala cun 131 maletgs vegn sondada sco cun in moviment da la camera. Quai correspunda a sia moda da lavurar tranter concepziun digitala e realisaziun fisica. Maletgs da corps stattan sper furmas abstractas e maletgs da pleds (p.ex. abitar, construir, pensar). Hochuli s’interessa per ils umans, lur relaziuns ed identitads; per la societad, ses stadi actual e ses svilup futur. Ins chatta en sias ovras connexs cun la sociologia, la musica e l’istorgia d’art. Ellas mettan en dumonda ils segns e lur influenzas culturalas, adina cun ina presa umor e savens era cun in zichel melanconia. Adina puspè èn integrads texts da l’artist che entran ensemen cun sias picturas en in dialog associativ cun il text poetic dad Ingo Niermann.

 


Andreas Hochuli, Cahier d’Artistes, 2021 © Andreas Hochuli / Bonbon / Pro Helvetia

andreashochuli.com

 

Sandra Knecht *1968, viva e lavura a Buus

Sandra Knecht è enconuschenta per ses pasts Immer wieder sonntags en il clavà Chnächt ch’ella ha transportà dal Giura a la riva dal Rain da Basilea. Ses art pratitgà cun cuschinar stat en il center dal Cahier d’Artistes e dal text da Koyo Kouoh. Questa pratica artistica cumpiglia la conservaziun da la patria sco era la tschertga d’identitad a maun da la savur e dal gust, da l’ospitalitad e da la scuverta dal potenzial transfurmativ che nascha cun preparar pasts e mangiar da cuminanza. Ultra da quai mussa la publicaziun che Knecht lavura era cun meds sco la fotografia ed il video, la sculptura e l’installaziun per elavurar las tematicas che la stattan a cor – responsabladad, egualitad dals dretgs, transfurmaziun.

 


Sandra Knecht, Cahier d’Artistes, 2021 © Sandra Knecht / Bonbon / Pro Helvetia

sandraknecht.ch

 

Marie Matusz *1994 Toulouse, viva e lavura a Basilea e Turitg

En ses Cahier d’Artistes mussa Marie Matusz d’ina vart fotografias en alv e nair da la chasa da sia basatta – in dachasa cun ritgas decoraziuns e nundumbraivlas reproducziuns da classichers da la pictura. L’annada sin las fotografias implitgescha ch’ellas èn vegnida fatgas il 1994. Ina prestaziun tecnica fallada che ha fascinà l’artista. Ella na s’interessa betg mo per la sociologia e la linguistica, mabain era per la filosofia e per dumondas da la dissoluziun dal temp e dal spazi. Da l’autra vart preschenta il Cahier d’Artistes differentas gruppas d’ovras che tematiseschan structuras da pussanza istoricas e contemporanas, la natira e la giustia. Alan Longino descriva l’atmosfera en l’ovra da Matusz cun la noziun Leucocholy emprestada da Thomas Gray: «a good easy sort of state», ina «melanconia alva», en la quala Matusz sa reconuscha bain.

 


Marie Matusz, Cahier d’Artistes, 2021 © Marie Matusz / Bonbon / Pro Helvetia

Noha Mokhtar *1987 Genevra, viva e lavura a Turitg e New York City

Inspirada da metodas da perscrutaziun etnograficas cumpiglia la pratica artistica da Noha Mokhtar la fotografia, l’installaziun ed objects. Ella examinescha co che spazis ed objects stattan en relaziun cun temas socials e politics e differentas furmas da pussanza. En sia lavur tematisescha ella noziuns sco istorgia, cultura e domesticitad. In focus particular metta ella sin la dumonda co ch’il spazi e la materialitad dal conturn influenzeschan las relaziuns socialas. En il Cahier d’Artistes entretscha Mokhtar atgnas lavurs fotograficas cun fotografias chattadas, ma era cun objects e texts curts. Sarah Rifky furnescha en ses essai metodas per analisar l’ovra da Mokhtar cun las suandantas noziuns: fauda, rotaziun, siemi, muster, traglischim, culada, ruttadira, repetiziun, descensiun.

 


Noha Mokhtar, Cahier d’Artistes, 2021 © Noha Mokhtar / Bonbon / Pro Helvetia

nohamokhtar.ch

 

Elena Montesinos *1971, viva e lavura a Genevra

Elena Montesinos è in’agitatura culturala en il meglier senn dal pled. Ella ha in chau plain ideas per projects artistics e curatorics. Quels na vegnan dentant betg adina realisads: pervia dals custs da producziun exorbitants, perquai ch’els èn vegnids refusads, perquai ch’els irriteschan u perquai ch’els èn simplamain illegals. En ses Cahier d’Artistes cun il titel UNRELEASED preschenta The Montesinos Foundation la realisaziun litterara da ventg projects nunpublitgads. Il Cahier d’Artistes pussibilitescha da viagiar en la fantasia da Montesinos, nua che ses potenzial activistic e transfurmativ po sa sviluppar libramain. Perquai che la collavuraziun e la polifonia èn centralas per l’artista, ha ella envidà tschintg cumpognas e cumpogns (Samuel Gross, Eve-Marie Knoerle, Irène Languin, Luca Pattaroni e Claude-Hubert Tatot) da scriver in curt text davart differents aspects da sia lavur (p.ex. ecologia u umor).

 


Elena Montesinos / The Montesinos Foundation, Cahier d’Artistes, 2021 © Elena Montesinos / Bonbon / Pro Helvetia

themontesinosfoundation.org

 

Ramaya Tegegne *1985 Genevra, viva e lavura a Genevra

Ramaya Tegegne dilucidescha ils mecanissems da dominanza e da relaziuns da pussanza entaifer la cultura cun observar lur economia, circulaziun ed istoriografia. Ella realisescha performances ed installaziuns e s’engascha cun la campagna Wages For Wages Against per in’economia alternativa e gista en l’art che porscha a las artistas ed als artists meglras cundiziuns da lavur ed ina paja adequata. Il Cahier d’Artistes da Tegegne dat ina survista da ses projects artistics ed activistics e tematisescha las relaziuns economicas, en las qualas quels vegnan realisads. Il text da Chaédria LaBouvier preschenta sia ovra en il context d’activissem, razza e schlattaina e dal quità vicendaivel («We Are Each Other’s Business, We Are Each Other’s Harvest»).

 


Ramaya Tegegne, Cahier d’Artistes, 2021 © Ramaya Tegegne / Bonbon / Pro Helvetia

ramaya.ch

 

Empustaziuns

Las publicaziuns pudais Vus empustar tar la chasa editura Edizioni Periferia.

periferia.ch

Giuria

  • Fanni Fetzer, directura dal Museum d’art da Lucerna
  • Luca Frei, artist, Lugano/Malmö
  • Samuel Leuenberger, curatur SALTS ed Parcours, Art Basel
  • Denis Pernet, Associate Curator Audemars Piguet Art Programme, Losanna

Oters dossiers