Societad interculturala
La Svizra tutga tar ils pajais cun la pli gronda part d’umans cun experientschas da migraziun. Il fenomen da la migraziun n’è tuttavia betg nov, ma el stat oz pli che mai en il center da la debatta politica. Cun l’iniziativa «societad interculturala» creescha Pro Helvetia in rom per sa fatschentar cun la diversitad d’ina societad interculturala: Co statti cun la diversitad en la cuntrada culturala svizra? Tge opziuns d’agir datti per rinforzar l’avertura interculturala dal manaschi cultural? Il program vul chattar emprimas respostas e preschentar a medem temp dumondas avertas.
L’iniziativa «societad interculturala», lantschada da Pro Helvetia per la perioda dal 2017 fin il 2020, ha las suandantas finamiras:
- svegliar ina debatta politic-culturala pratica
- sensibilisar il champ cultural per avischinaziuns interculturalas en connex cun la concepziun dal persunal, dal program e dal public
- sustegnair projects da pilot ed instruments en connex cun il tema da l’interculturalitad en la pratica culturala
