Sectur interdisciplinar
Blers projects culturals sa laschan attribuir cleramain ad ina sparta d’art. Auters han in caracter che cumpiglia pliras spartas, vegnan dentant giuditgads en secturs spezials etablids. Ils spezialists da la musica e dal teater s’occupeschan da producziuns da teater musical, fertant che las producziuns da circus èn da chasa en il sectur dal saut e teater ed ils projects da medias èn da plazzar en ils arts visuals. E lura datti ils projects che cumpiglian pliras spartas che mettan en dumonda u surpassan cunfins disciplinars u cruschan a nova moda e maniera disciplinas e che na pon per quest motiv betg recurrer a sistems da promoziun etablids. Per che quels na restian betg tranter sutgas e bancs prenda Pro Helvetia encunter dumondas per projects interdisciplinars.
Sco producziuns interdisciplinaras valan producziuns che integreschan conceptualmain pliras disciplinas, en spezial era resguardond novas medias e tecnologias. Per regla èn integradas almain trais spartas che vegnan promovidas da Pro Helvetia. Per il giudicat sa barattan las spezialistas ed ils spezialists da las partiziuns spezialisadas pertutgadas.
Nus assegnain contribuziuns ad ovras per novas producziuns interdisciplinaras sco era contribuziuns a projects da turnea e represchentaziuns ospitantas en Svizra ed a l’exteriur. Entaifer la Svizra stat en il center il pass sur il cunfin linguistic sco criteri il pli impurtant. Plinavant surdain nus era contribuziuns a festivals en tut il mund che curateschan en pliras spartas ed han in focus svizzer.
