© Matthieu Croizier

Arts scenics

A tgi sa drizzan noss formats?

Nus promovain tut las furmas dals arts scenics sco il saut, il teater, il teater musical, il circus contemporan u l’art sin via.

Nossas activitads da promoziun sa drizzan ad artist:as professiunal:as, vul dir tant a gruppas independentas sco er ad instituziuns.

Tgeninas èn nossas activitads da promoziun?

  • preschientschas sin plattafurmas ed accents svizzers a l’exteriur
  • represchentaziuns en autras regiuns linguisticas da la Svizra ed a l’exteriur; ultra da quai translaziuns, adattaziuns linguisticas e provas da represa
  • mesiras da promoziun en Svizra ed a l’exteriur
  • instruments per crear raits e sa sviluppar vinavant
  • contribuziuns da retschertga e da producziun
  • residenzas e viadis da retschertga
  • programs per giuv:nas artist:as en collavuraziun cun instituziuns partenarias
  • Pro Helvetia sustegna ensemen cun las citads ed ils chantuns cumpagnias independentas cun cunvegnas da promoziun cooperativas
  • Pro Helvetia sustegna ensemen cun ils chantuns ils projects da Reso – Réseau Danse Suisse

Swiss Performing
Arts Selection

Swiss Performing Arts Selection è ina pagina-web en lingua englaisa. Ella preschenta ina tscherna da gruppas e d’artist:as da la Svizra che van regularmain sin turnea a l’exteriur ed èn per quai vegnids sustegnids finanzialmain da Pro Helvetia.


FAQs

Jau stun en Svizra, n’hai dentant betg la naziunalitad svizra. Poss jau inoltrar ina dumonda da sustegn?

Gea. Nus sustegnain artist:as activ:as en Svizra, independentamain da lur naziunalitad, sch’ellas u els èn s’etablid:as en la scena culturala svizra.

Jau sun Sviz:ra, stun dentant a l’exteriur. Poss jau inoltrar ina dumonda da sustegn?

Nus sustegnain artist:as e gruppas che han lur focus da lavur en Svizra. Sche Vus stais a l’exteriur, stuais Vus pudair cumprovar che Vus faschais part da la scena svizra (p.ex. cun esser regularmain activ:a en Svizra, avair represchentaziuns en differentas regiuns da la Svizra, survegnir daners da promoziun da la Svizra e vegnir percepida sco gruppa svizra).

Tge manegia Pro Helvetia cun «impurtanza naziunala»?

In’occurrenza ha per nus impurtanza naziunala, sche sia programmaziun resguarda posiziuns da pliras regiuns linguisticas e sche l’occurrenza ha en general ina radiaziun surregiunala. Per la promoziun d’artist:as èn decisivas represchentaziuns surregiunalas regularas.

Poss jau inoltrar ina dumonda da sustegn per ina turnea en la medema regiun linguistica?

Na. Nus sustegnain exclusivamain represchentaziuns che han lieu mintgamai en las autras regiuns linguisticas. La dumonda da sustegn sto inoltrar l’instituziun organisatura.

Poss jau inoltrar il medem project il medem mument en plirs champs da promoziun?

Na. Vus stuais As decider per in champ da promoziun specific, cura che Vus inoltrais la dumonda da sustegn.

Jau studegel en Svizra. Poss jau inoltrar a Pro Helvetia ina dumonda per in stipendi?

Na. Nus na dain nagins stipendis. Nossas activitads da promoziun sa drizzan ad artist:as professiunal:as cun ina scolaziun terminada.


Avais vus dumondas e vulais vus discurrer cun ina commembra u cun in commember dal team?

Il team a in’egliada