© Eurostandard

Arts visuals

Promoziun dals arts visuals

A tgi sa drizzan noss formats?

Nus promovain la creaziun e la derasaziun d’art figurativ, fotografia, art medial, performance ed architectura contemporana.

Nus sustegnain artist:as professiunal:as, instituziuns, organisatur:as e chasas edituras che preschentan u contextualiseschan lavurs artisticas.

Tgeninas èn nossas activitads da promoziun?

  • preschientschas sin plattafurmas ed accents svizzers
  • occurrenzas ordaifer la Svizra, surtut exposiziuns e festivals
  • occurrenzas en autras regiuns linguisticas da la Svizra, surtut exposiziuns e festivals
  • publicaziuns davart la creaziun artistica contemporana da la Svizra
  • retschertgas curatoricas ed artisticas sco era formats da barat professiunals cun finamiras cleras («visitas d’atelier»)
  • novas producziuns artisticas cun contribuziuns da producziun che vegnan publitgadas mintga semester
  • projects fotografics cun la promoziun da publicaziuns e cun ina publicaziun annuala («Focus Photo»)
  • promoziun da la generaziun giuvna cun sustegns publitgads mintga semester per spazis d’art, residenzas e contribuziuns a gallarias per la preschientscha a fieras

FAQs

Jau dumandass gugent ina contribuziun da producziun per in project en il champ dals arts visuals. I sa tracta d’in film curt. Poss jau inoltrar ina dumonda da sustegn a Pro Helvetia?

Pro Helvetia n’è betg responsabla per la promoziun dal film e na promova perquai da princip nagins projects da film. Ella po dentant sustegnair projects d’art realisads cun agid dal medium film/video.

Jau sun artist:a e sun vegni:da envida:da da preschentar mes film ad in festival internaziunal che na cumpara betg sin la glista da promoziun da Swiss Films. Poss jau inoltrar ina dumonda da sustegn a Pro Helvetia?

Impurtant è il context dal diever, damai la preschientscha ad exposiziuns u festivals en lieus relevants per ils arts visuals. Sche la lavur è vegnida realisada fin ussa per gronda part en il context da festivals/films, èn responsabels per Vossa dumonda ils posts da la promoziun dal film da las citads, dals chantuns u da la Confederaziun.

È mes status da dimora en Svizra relevant per valitar mia relaziun cun la Svizra? Stoss jau avair ina permissiun da dimora specifica en Svizra per avair il dretg d’ina promoziun?

Na, la relaziun cun la Svizra na dependa betg da Vossa permissiun da dimora. In segiurn (cun domicil stabel) en Svizra ed ina preschientscha artistica en Svizra èn dentant necessaris, v.d. Vus pudais cumprovar in’activitad d’exposiziun regulara en lieus d’art cun radiaziun surregiunala.

Jau hai udì da Vossa seria «Cahiers d’Artistes» che promova emprimas monografias d’artist:as. Jau na chat naginas infurmaziuns davart questa promoziun sin la pagina-web. Co poss jau inoltrar ina dumonda da sustegn?

La publicaziun dals Cahiers d’Artistes è vegnida sistida cun l’ediziun 2023. Pro Helvetia promova monografias d’artist:as cun la promoziun da publicaziuns, premess che la pratica artistica da circa diesch onns vegnia documentada.

Vus promovais publicaziuns dal champ da la «fotografia artistica, documentara e/u applitgada». Fa era la fotografia da pressa part da questa promoziun?

Na. La fotografia da pressa sco champ specific e sco pratica na fan betg part da noss secturs da promoziun.

Jau organisesch in project en/cun ina gallaria commerziala/ina collecziun privata. Poss jau inoltrar ina dumonda da sustegn?

Na. Projects da collecziuns privatas e da gallarias commerzialas (cun excepziun da preschentaziuns a fieras en il rom da la promoziun da la generaziun giuvna) èn exclus da la promoziun.

Vus menziunais en Vossa promoziun da publicaziuns mo monografias e publicaziuns tematicas. Èn tut las autras publicaziuns exclusas, era catalogs d’exposiziun u publicaziuns festivas?

Gea. Exclus èn catalogs d’exposiziun, publicaziuns festivas, ovras da consultaziun, ediziuns bibliofilas, reediziuns e novas ediziuns da publicaziuns sco era publicaziuns en l’ediziun privata u cunter pajament.

Jau sun artist:a ed hai gudagnà in premi. L’exposiziun/publicaziun/retscha d’occurrenzas che vegn realisada en connex cun quel na vegn betg cuverta da la summa dal premi. Poss jau inoltrar ina dumonda da sustegn?

Na. Projects en il rom da premis/distincziuns ed occurrenzas correspundentas èn exclus da la promoziun.

Jau organisesch in’exposiziun/ina publicaziun davart in:a artist:a mort:a. Poss jau inoltrar ina dumonda da sustegn?

Na. Projects che focusseschan sin posiziuns istoricas u posiziuns d’artist:as mort:as (p.ex. en furma d’exposiziuns u da publicaziuns) èn exclus da la promoziun.

Fa la promoziun da l’architectura (p.ex. cun exposiziuns u publicaziuns) da Pro Helvetia part dal sectur da design u dal sectur dals arts visuals?

L’architectura vegn promovida sco part dals arts visuals.


Avais vus dumondas e vulais vus discurrer cun ina commembra u cun in commember dal team?

Il team a in’egliada