© Nadia Lanfranchi & Nina Oppliger

Diversitad ed egualitad da las schanzas

Nus ans engaschain per la diversitad e l’egualitad da las schanzas en il manaschi cultural. Nus gidain instituziuns culturalas da sviluppar process orientads a la diversitad, promovain il transfer da savida e mettain a disposiziun manuals orientads a la pratica per il manaschi cultural. Ultra da quai ans engaschain nus per la retschertga e l’intermediaziun da datas e da fatgs davart la diversitad en il manaschi cultural svizzer. En las diversas spartas ans engaschain nus per dapli visibladad, la creaziun da raits a favur d’artist:as e per ina pli auta cumpatibilitad da professiun e famiglia.

Promoziun da Diversitad ed egualitad da las schanzas

A tgi sa drizzan noss formats?

Noss formats da promoziun sa drizzan ad instituziuns ed organisaziuns culturalas svizras da tut las spartas promovidas da Pro Helvetia.

Tgeninas èn nossas activitads da promoziun?

  • lavuratori davart process da diversitad en il manaschi cultural
  • accumpagnament da process cun expert:as da diversitad
  • occurrenzas e svilup d’instruments da lavur per il manaschi cultural svizzer
  • activitads da promoziun specificas en las differentas spartas
  • monitoring dal gender en instituziuns culturalas

Tools & Links

Miriam Camara – Diversitätsorientierte Organisationsentwicklung in Kunst- und Kulturorganisationen

Untertitelt auf Deutsch, Französisch, Italienisch und Englisch

Ivana Pilić – Kulturorientierte Öffnungen in der Migrationsgesellschaft

Untertitelt auf Deutsch, Französisch, Italienisch und Englisch

FAQs

Tge manegia Pro Helvetia cun «diversitad» ed «egualitad da las schanzas»?

Il pled diversitad focussescha sin la renconuschientscha dals tratgs cuminaivels e da las differenzas tranter ils umans. En il center stat la determinaziun da differenzas socialas ch’è creschida istoricamain ed ha chaschunà inegualitads socialas. Ella sa referescha a differentas dimensiuns sco la derivanza, la schlattaina, la vegliadetgna, la lingua, la posiziun sociala, ils models da vita, l’orientaziun sexuala, la persvasiun religiusa, ideologica u politica sco er l’impediment corporal, spiertal u psichic (cf. Constituziun federala svizra art. 8).

Cun l’egualitad da las schanzas manegiain nus la participaziun eguala da tuttas e tuts a la vita culturala, politica, economica e sociala, independentamain da la schlattaina, da la derivanza e d’autras differenzas socialas. In access egalitar vul dir che tuttas e tuts han las medemas schanzas da partenza e la medema pussaivladad da profitar da questas schanzas. Ina lavur orientada a l’egualitad da las schanzas ha damai la finamira principala da reducir barrieras e discriminaziuns structuralas.

Tge è in process da diversitad? Tge vegn sustegnì exactamain?

Process da diversitad èn stentas da transfurmar a lunga vista instituziuns ed organisaziuns en connex cun la diversitad. La finamira da quests process da diversitad è da reducir discriminaziuns structuralas e las barrieras correspundentas. En il manaschi cultural vegn mess il focus sin la diversificaziun dals «trais P»:

  • persunal (tgi lavura en il manaschi cultural?),
  • programs (tge vegn offert? tgi vegn promovì?) e
  • public (tge public ha access a las purschidas?)

En quest rom sustegna Pro Helvetia surtut la collavuraziun da las organisaziuns culturalas cun expert:as da la diversitad. Quellas e quels accumpognan lur process da diversitad e las cusseglian en connex cun il svilup da finamiras e da mesiras.

Jau sun artist:a e vuless inoltrar ina dumonda da sustegn per mes project artistic che sa fatschenta cun temas feministics. Sun jau qua en il dretg lieu?

Per in sustegn a projects artistics pudais Vus inoltrar ina dumonda en las differentas spartas promovidas da Pro Helvetia. En il rom da l’accumpagnament da process e dal transfer da savida per promover la diversitad e l’egualitad da las schanzas sustegnain nus unicamain transfurmaziuns structuralas en instituziuns u organisaziuns culturalas.

Jau organisesch in festival da musica internaziunal cun in program che cumpiglia unicamain musicist:as da gruppas marginalisadas. Gugent inoltrass jau ina dumonda da sustegn a Pro Helvetia. È quai pussaivel?

La partiziun da musica prenda encunter las dumondas d’instituziuns che organiseschan in festival da musica. Sche Vus planisais percunter in’occurrenza discursiva (p.ex. in lavuratori, in retscha da discussiuns) cun musicist:as ed expert:as da diversitad davart exclusiuns structuralas en il manaschi da musica, pudais Vus inoltrar Vossa dumonda sut la rubrica «occurrenza e/u instrument da lavur per promover la diversitad e l’egualitad da las schanzas».

Jau ma fatschent dapi plirs onns cun temas da la diversitad ed hai legì blera litteratura spezialisada. Tanscha mia expertisa da la diversitad per inoltrar ina dumonda a Pro Helvetia?

Expert:as da diversitad na pon betg inoltrar ina dumonda a nus. Ellas ed els ston vegnir proponid:as sco accumpagnad:ras da process en il rom d’ina dumonda d’ina organisaziun culturala. Sche Vus accumpagnais sin il pli pauc dapi dus onns process da diversitad en il champ cultural, pudais Vus As laschar metter sin nossa glista da coaches. Quella vegn actualisada ina giada ad onn.

Jau vuless inoltrar ina dumonda da sustegn per in project d’intermediaziun che sa deditgescha a temas da la diversitad ed integrescha formats da sensibilisaziun. Sun jau qua en il dretg lieu?

En il rom da la diversitad e da l’egualitad da las schanzas èn exclusas contribuziuns a formats da sensibilisaziun punctuals davart quests temas. Ultra da quai na sustegnain nus ni la concepziun ni la realisaziun da projects d’intermediaziun. Projects d’intermediaziun vegnan promovids da Pro Helvetia en il rom da la tematica «reflexiun critica».

Sco fundaziun privata che surdat mintg’onn in Diversity Award organisassan nus gugent in panel cun artist:as. Dastgain nus inoltrar ina dumonda en il rom da la tematica diversitad ed egualitad da las schanzas?

Projects en il rom da premis/distincziuns ed occurrenzas respectivas èn exclus d’in sustegn.


Avais vus dumondas e vulais vus discurrer cun ina commembra u cun in commember dal team?

Il team a in’egliada