Image by Bienvenue Studios

Ecologia e clima

Nus ans engaschain per in svilup persistent, la protecziun dal clima ed il diever spargnus da resursas en il manaschi cultural. Nus gidain instituziuns ed organisaziuns culturalas a sviluppar models da producziun e da derasaziun che resguardan il clima e las resursas e promovain la creaziun da raits, il transfer da savida ed il svilup d’instruments da lavur. En las differentas spartas ans engaschain nus per ina mobilitad cumpatibla cun las pretensiuns climaticas e per in diever da material reducì en la producziun artistica.

Promoziun dal ecologia e clima

A tgi sa drizzan noss formats?

Noss formats da promoziun sa drizzan ad instituziuns ed organisaziuns culturalas sco er ad artist:as da tut las disciplinas promovidas da Pro Helvetia.

Tgeninas èn nossas activitads da promoziun?

  • occurrenzas e svilup d’instruments da lavur per il manaschi cultural svizzer
  • programs da promoziun specifics cun instituziuns partenarias
  • artist:as pon s’annunziar ensemen cun expert:as da persistenza per in barat.

FAQ

Jau sun artist:a e vuless inoltrar ina dumonda da sustegn per mes project artistic che sa fatschenta cun la midada climatica. Sun jau qua en il dretg lieu?

Per in sustegn a projects artistics che sa fatschentan cun temas ecologics (il clima ed il diever spargnus da resursas, etc.) pudais Vus inoltrar ina dumonda da sustegn en las spartas promovidas da Pro Helvetia. «Ecologia e clima» metta il focus sin il svilup d’instruments da lavur che promovan models da producziun e da derasaziun favuraivels al clima e la creaziun da raits.

Jau vuless crear ina bilantscha da CO2 per mia instituziun culturala. Promova Pro Helvetia bilantschas da CO2 u bilantschas ecologicas?

Na, nus na promovain naginas bilantschas da CO2 u bilantschas ecologicas individualas per instituziuns ed organisaziuns culturalas. Gugent renviain nus a calculaturs da CO2 existents sco KlimAktiv per film e medias, il Sustainable Event Monitoring System e Creative Green Tools.

Jau ma fatschent dapi plirs onns cun temas ecologics e climatics ed hai legì blera litteratura spezialisada. Tanscha mia expertisa per inoltrar ina dumonda da sustegn a Pro Helvetia?

Expert:as da persistenza na pon betg inoltrar ina dumonda a Pro Helvetia. Ellas ed els ston vegnir proponid:as sco expert:as da persistenza en il rom d’ina dumonda d’ina instituziun u organisaziun culturala.

Jau vuless inoltrar ina dumonda da sustegn per in project d’intermediaziun che sa deditgescha tematicamain a temas da persistenza ed integrescha formats da sensibilisaziun. Sun jau qua en il dretg lieu?

En il rom dad «Ecologia e clima» èn exclusas contribuziuns a formats da sensibilisaziun punctuals davart temas da persistenza. Ultra da quai na sustegna Pro Helvetia ni la concepziun ni la realisaziun da projects d’intermediaziun. La promoziun da projects d’intermediaziun fa Pro Helvetia en il rom da la tematica «reflexiun critica».

Sco fundaziun privata che surdat mintg’onn in premi da persistenza organisassan nus gugent in panel cun artist:as. Dastgain nus inoltrar ina dumonda da sustegn ad «Ecologia e clima»?

Projects en il rom da premis/distincziuns e d’occurrenzas respectivas èn exclus d’in sustegn.


Avais vus dumondas e vulais vus discurrer cun ina commembra u cun in commember dal team?

Il team a in’egliada