Chattar sustegn
© Flora Mottini

Musica

Promoziun da la musica

Chattar sustegn
Premissas generalas (en tudestg)
Contribuziuns assegnadas

A tgi sa drizzan noss formats?

Nus sustegnain la creaziun musicala professiunala actuala e contemporana e sia derasaziun e promoziun. 

Nossas activitads da promoziun sa drizzan tant ad artistas professiunalas ed artists professiunals sco er ad instituziuns organisaturas, per exempel festivals, che preschentan la creaziun musicala da la Svizra

Tgeninas èn nossas activitads da promoziun?

  • preschientschas sin plattafurmas, accents svizzers ordaifer la Svizra 
  • turneas e represchentaziuns internaziunalas 
  • mesiras da promoziun entaifer ed ordaifer la Svizra  
  • contribuziuns da creaziun e da producziun per novas ovras musicalas  
  • festivals ed occurrenzas ordaifer la Svizra cun bands e musicistas e musicists da la Svizra sco era represchentaziuns internaziunalas d’ovras da cumponistas contemporanas e cumponists contemporans da la Svizra 
  • festivals ed occurrenzas en Svizra cun musica contemporana/actuala dad autras regiuns linguisticas dal pajais  
  • programs stagiunals d’ensembles cun almain trais producziuns novas resp. premieras da cumponistas e cumponists contemporans da la Svizra 
  • emprima collavuraziun (featuring) d’artistas e d’artists da la scena da hip-hop e/u da la scena da clubbing cun la finamira d’in release communabel 
  • instruments per crear raits e sviluppar vinavant carrieras internaziunalas  
  • residenzas e viadis da retschertga 
  • programs per giuvnas artistas e giuvens artists en collavuraziun cun instituziuns partenarias 
  • Pro Helvetia porscha ensemen cun la FONDATION SUISA la plattafurma SWISS MUSIC
  • ro Helvetia sustegna ensemen cun instituziuns da promoziun l’organisaziun Swiss Music Export 
  • Pro Helvetia sustegna ensemen cun instituziuns da promoziun internaziunalas il Fonds Impuls neue Musik
  • Pro Helvetia sustegna la rait da giuvnas artistas e da giuvens artists Liveurope
  • Pro Helvetia sustegna la rait europeica SHAPE+ per musicistas e musicists da las spartas da la musica experimentala ed electronica 

What’s on

Vesair tut

FAQs

Sustegna Pro Helvetia turneas entaifer la Svizra?

Na, ma ella po sustegnair represchentaziuns en autras regiuns linguisticas, sche quellas han lieu en il rom da festivals e d’occurrenzas impurtantas. La dumonda sto inoltrar per regla l’instituziun organisatura. 

Tge manegia Pro Helvetia cun musica «actuala» resp. «contemporana»?

Cun musica actuala resp. musica contemporana manegiain nus la creaziun musicala dad auturas ed auturs ch’èn oz artisticamain activas ed activs. Projects en il rom dal patrimoni musical e projects cun in repertori istoric na sustegnain nus betg.  

Duess jau inoltrar mia dumonda tar «creaziun e producziun: musica actuala» u tar «creaziun e producziun: musica contemporana»?

Musicistas e musicists che fan musica dals suandants geners inoltreschan lur dumonda tar «creaziun e producziun: musica actuala»: pop, rock, jazz, electronica, experimentala, global sounds, hip-hop, etc.  

Musicistas e musicists che fan plitost musica contemporana cun in ina basa academica (musica nova, l’art da suns, improvisaziun, musica electronica) inoltreschan lur dumonda tar «creaziun e producziun: musica contemporana».   

Sustegna Pro Helvetia represchentaziuns da musicistas e musicists da la Svizra en l’exteriur era, sche quellas e quels na sunan betg musica actuala resp. musica contemporana dad auturas ed auturs da la Svizra?

Na. Nus promovain la creaziun musicala svizra actuala resp. contemporana. Projects senza connex cun la creaziun musicala svizra actuala resp. contemporana (p.ex. cun in repertori istoric u cun ovras da cumponistas e cumponists d’auters pajais che la Svizra) na sustegnain nus betg.  

Jau studegel en Svizra. Poss jau inoltrar ina dumonda da stipendi a Pro Helvetia?

Na. Nus na dain nagins stipendis. Nossas activitads da promoziun sa drizzan ad artistas professiunalas ed artists professiunals cun ina scolaziun terminada.  

Poss jau inoltrar ina dumonda da sustegn per il medem project il medem mument en plirs champs da promoziun?

Na. Vus stuais As decider per in champ da promoziun specific, cura che Vus inoltrais la dumonda da sustegn.  

Mes project è in teater musical / in’installaziun sonora / in’ovra audiovisuala / in’ovra musicala da caracter interdisciplinar. Nua poss jau inoltrar mia dumonda da sustegn?

Inoltrai p.pl Voss project tar «creaziun e producziun: musica actuala» u tar «creaziun e producziun: musica contemporana». La differenza tranter musica actuala e musica contemporana vegn declerada plinensi en questas FAQ.  

Jau abitesch en Svizra, n’hai dentant betg la naziunalitad svizra. Poss jau inoltrar ina dumonda da sustegn?

Gea. Nus sustegnain artistas ed artists che lavuran en Svizra, independentamain da lur naziunalitad, sch’ellas u sch’els èn s’etablidas u s’etablids en la scena ed èn preschentas e preschents regularmain ad occurrenzas relevantas.  

Jau hai la naziunalitad svizra, stun dentant a l’exteriur. Poss jau inoltrar ina dumonda da sustegn?

Nus sustegnain artistas ed artists che han lur focus da lavur principal en Svizra. Sche Vus abitais a l’exteriur, stuais Vus pudair cumprovar che Vus faschais part da la scena svizra (p.ex. cun esser regularmain activa u activ en Svizra, avair represchentaziuns en differentas regiuns da la Svizra e vegnir percepida u percepì sco artista u artist da la Svizra). 

Tge manegia Pro Helvetia cun «impurtanza surregiunala»?

In’occurrenza ha per nus impurtanza surregiunala, sche sia programmaziun resguarda posiziuns naziunalas e sche l’occurrenza ha en general ina radiaziun naziunala.  

Per la promoziun da musicistas e musicists è decisiva la preschientscha surregiunala en la scena da musica. Quella è dada, sch’ins fa regularmain part dal program d’occurrenzas renconuschidas en autras regiuns da la Svizra u a l’exteriur.  

Sustegna Pro Helvetia la cumpra d’instruments?

Na. Nus na dain naginas contribuziuns per cumpras ed investiziuns e na contribuin era nagut als custs da gestiun. 

Avais vus dumondas e vulais vus discurrer cun ina commembra u cun in commember dal team?

Contact

Il team a in’egliada

Organisaziun