Nossa missiun

Nus attribuin contribuziuns per creaziuns e per producziuns e contribuin uschia a la producziun da creaziuns, da producziuns u da prototips artistics d’ina fitg auta qualitad.

Nus sustegnain la derasaziun da la lavur artistica e culturala contemporana ed il barat tranter las regiuns, per exempel cun contribuziuns a turneas, represchentaziuns, prelecziuns, concerts, exposiziuns, translaziuns e festivals.

Ad artistas ed artists cun il potenzial d’ina carriera naziunala u internaziunala purschain nus en collavuraziun cun instituziuns partenarias elegidas programs da residenza e da coaching, pussibilitain occasiuns da sa preschentar e concedin contribuziuns ad offertas per crear raits da contacts. 

Cun programs da sustegn e da retschertga specifics gidain nus ad identifitgar sfidas e svilups essenzials en la promoziun da la cultura, a sviluppar mesiras correspundentas ed a stgaffir impuls e spazi per l’innovaziun.

Nus sustegnain mesiras che pussibiliteschan al public da s’occupar independentamain cun la lavur artistica e culturala contemporana. Promovidas vegnan surtut novas furmas da la reflexiun critica davart la lavur artistica e culturala contemporana.

Nus sustegnain la derasaziun da la lavur artistica e culturala da la Svizra sco era il barat cun auters spazis culturals cun contribuziuns ad occurrenzas, projects e translaziuns d’impurtanza. Nus contribuin cun mesiras da promoziun a la percepziun ed a la colliaziun professiunala dad artistas e d’artists da la Svizra tar organisaturs e tar experts en Svizra ed a l’exteriur.

Nus organisain e finanziain preschentaziuns svizras sin plattafurmas ed a festivals a l’exteriur, accents svizzers ad occurrenzas cun in’attracziun internaziunala sco era mesiras per la promoziun internaziunala. Uschia pussibilitain nus ad artistas ed artists da la Svizra da sa posiziunar meglier en raits e martgads internaziunals e da vegnir resguardà pli ferm d’organisaturas e d’organisaturs en Svizra ed a l’exteriur

Nus sustegnain il barat cun auters spazis culturals cun agid da residenzas, da retschertgas e da cooperaziuns tranter artistas ed artists da la Svizra e d’auters pajais. 

Ultra da quai mettain nus il focus sin novas raits, novas regiuns e novs martgads, nua che nus vesain il potenzial d’in barat pli intensiv e d’ina preschientscha pli ferma da l’art e da la cultura da la Svizra e prendain surtut en mira la creaziun da partenadis cun organisaturas ed organisaturs regiunals.