Noss biros e partenaris en l’entir mund

Trais da noss posts exteriurs festiveschan giubileums radunds.
Tar las festivitads

Philippe Bischof daventa il nov directur da Pro Helvetia

104 annunzias, in nov directur: la Fundaziun svizra per la cultura Pro Helvetia vegn en futur manada da Philippe Bischof. El maina actualmain la partiziun Cultura dal departament presidial da Basilea-Citad.

Il cussegl da fundaziun da la Fundaziun svizra per la cultura Pro Helvetia ha elegì ier saira unanimamain Philippe Bischof sco nov directur. El vegn ad entrar en uffizi il 1. da november 2017. La procedura d’annunzia – realisada d’in biro da selecziun da cader extern e manada d’ina cumissiun da selecziun – ha cumenzà l’entschatta november. Il president da la fundaziun Charles Beer commentescha l’elecziun sco suonda: «Philippe Bischof unescha tut las qualificaziuns centralas che nus avain indentifitgà per questa funcziun: el ha visiuns cleras, è integrativ ed ha experientschas cun il management d’ina organisaziun multifara. El è la persuna ideala per las incumbensas pretensiusas da quest uffizi – en spezial per l’elavuraziun da la proxima missiva da cultura».

Philippe Bischof
Philippe Bischof (naschì il 1967 a Basilea) lavura dapi 25 onns en differentas funcziuns dal sectur cultural. Sia carriera cumenza el sco assistent da reschia da Frank Baumbauer al Teater da Basilea. I suondan staziuns en la direcziun artistica dal Teater Göttingen e sco reschissur liber e dramaturg en Svizra franzosa, Frantscha, Germania, Svezia ed Islanda. Parallelamain absolvescha el in Master of Advanced Studies (MAS) en management da cultura a l’Universitad da Basilea.

Sco gestiunari e cussegliader artistic metta el en pe ils onns 2008 fin 2011 il center cultural Südpol a Lucerna. Quel po el etablir cun success sco plattafurma per la creaziun artistica interdisciplinara, e quai tant sin plaun naziunal sco er internaziunal. Ils ultims diesch onns surpiglia el plinavant regularmain mandats da cussegliaziun per instituziuns culturalas en Svizra ed a l’exteriur. El lavura sco docent per politica culturala e la promoziun da la cultura ed è commember da giurias en il sectur dal saut e dal teater.

Dapi il 2011 maina Philippe Bischof la partiziun Cultura en il departament presidial da Basilea-Citad ed è uschia responsabel per tut las lavurs da promoziun da cultura dal chantun. En questa funcziun maina el tranter auter ils museums chantunals, l’archiv chantunal e la perscrutaziun archeologica dal terren. Dapi il schaner 2017 è el plinavant president da la Conferenza dals incumbensads chantunals per dumondas culturalas.

Philippe Bischof surpiglia sia nova funcziun sco directur da Pro Helvetia il 1. da november 2017. Fin lura maina Sabina Schwarzenbach la fundaziun interimisticamain.

Pro Helvetia
Pro Helvetia sustegna per incumbensa da la Confederaziun l’art e la cultura svizra. Ella promova il barat cultural tranter las regiuns svizras e derasa art svizzer a l’exteriur. Plinavant dat ella impuls culturals cun atgnas iniziativas. La fundaziun maina il Centre culturel suisse a Paris e sustegna ils programs da cultura dals instituts svizzers a Roma, Venezia, Milaun e New York sco er il swissnex a San Francisco. A Cairo, Johannesburg, New Delhi, Shanghai e Moscau dispona la fundaziun dad agens biros da colliaziun che funcziunan sco agenturas culturalas manadas al lieu.

Per la fin dal 2016 occupescha Pro Helvetia 90 collavuraturas e collavuraturs en Svizra ed a l’exteriur. Il budget per l’onn current importa 40,1 milliuns francs.

Dapli infurmaziuns: www.prohelvetia.ch

Maletgs da pressa d’auta resoluziun e downloads:
www.prohelvetia.ch/medien/downloads

Infurmaziuns a las medias:
Lisa Stadler, communicaziun
T +41 267 71 51, lstadler@prohelvetia.ch

Cummunicaziuns da la Fundaziun svizra per la cultura Pro Helvetia, 04.04.2017