La Fundaziun svizra per la cultura Pro Helvetia vegn manada a partir dal 1. da fanadur 2025 da Michael Kinzer. Actualmain maina el il Servetsch da la cultura da la cità da Losanna.
La fundaziun s’allegra da pudair communitgar il num dal nov directur, Michael Kinzer, che vegn ad entrar en uffizi il 1. da fanadur 2025.
Il president da la fundaziun Michael Brändle commentescha l’elecziun suandantamain:
«Michael Kinzer dispona da qualificaziuns perfetgas per las incumbensas pretensiusas en questa posiziun. Sias experientschas fundadas en il sectur da la politica culturala e da la promoziun da cultura al permettan d’accumplir a moda optimala la missiun da la fundaziun da s’engaschar sin il plaun naziunal ed internaziunal a favur da la creaziun artistica e culturala da la Svizra. Jau engraziel gia oz al directur partent Philippe Bischof per sia gronda lavur e ses engaschament a favur da la lavur culturala da noss pajais.»
Michael Kinzer declera suenter sia elecziun:
«La cultura è il cor da nossa societad. Ella sto vegnir accumpagnada, promovida e derasada. Pro Helvetia gioga en quest rom in rolla unica ed essenziala. Per mai èsi in plaschair da pudair cuntinuar a metter mia energia e mias persvasiuns en il servetsch da la vitalitad e diversitad da la scena culturala da noss pajais.»
La procedura d’annunzia, consistenta da pliras rundas e d’in assessment, è vegnida realisada d’ina agentura externa spezialisada sin la recrutaziun da cader. Ina cumissiun da tschintg persunas, delegada dal Cussegl da fundaziun, ha accumpagnà la procedura. Il Cussegl da fundaziun ha elegì Michael Kinzer unanimamain en sia sesida dals 19 da november 2024. El vegn ad entrar en uffizi il 1. da fanadur 2025.
Davart la persuna
Michael Kinzer (*1972) maina dapi il 2017 il Servetsch da la cultura da la cità da Losanna ed è il co-president da la Conferenza da la citads per dumondas da cultura. Ses curs da la vita reflectescha numerusas posiziuns diversas en il sectur cultural, tant en la direcziun artistica sco era en il sectur da management. Sia carriera ha cumenzà sco responsabel dal program en la sala da concerts Fri-Son a Friburg. Lura ha el cuntinuà sco coordinatur general per l’Expo.02 e co-directur dal project Cargo sin l’arteplage a Neuchâtel. Suenter ha el surpiglià la direcziun generala d’ina fundaziun che cumpiglia il Théâtre Populaire Romand e la sala da musica ed il teater da L’heure bleue a La Chaux-de-Fonds. Dal 2009 al 2015 ha el manà il Festival de la Cité a Losanna. El è sta commember da numerusas giurias e cumissiuns da cultura sin plaun regiunal e naziunal, t.a. sco president da la Giuria federala da musica.
Fotos
Infurmaziuns
Ursula Pfander
Relaziuns cun las medias
+41 44 267 71 30
media@prohelvetia.ch
