61avla Exposiziun d’art internaziunala – La Biennale di Venezia 2026
La Biennala d’art da Venezia è ina da las pli impurtantas exposiziuns d’art contemporan. Ella offra a las artistas ed als artists ina vaidrina visibla en l’entir mund cun in public internaziunal.
La Svizra posseda e maina in pavigliun en ils Giardini della Biennale. Pro Helvetia è dapi il 2012 responsabla per las contribuziuns en il Pavigliun svizzer. Sco cumissaria d’exposiziun definescha la Fundaziun svizra per la cultura las proceduras da selecziun e las giurias e nominescha las persunas u ils teams che realiseschan ils projects en il Pavigliun svizzer.
Per la Biennala d’art 2026 tscherna Pro Helvetia la contribuziun en il Pavigliun svizzer per l’emprima giada en il rom d’ina publicaziun averta.
Tschertgads èn projects artistics e curatorics che s’occupan da maniera originala da dumondas artisticas, socialas e politicas actualas. Ils formats e meds artistics èn libers e duain esser transdisciplinars. La premissa è in cler connex cun la Svizra e cun sia creaziun artistica contemporana.
Tge?
- Pro Helvetia tscherna la contribuziun svizra per la 61avla Exposiziun d’art internaziunala – La Biennale di Venezia 2026 en il rom d’ina publicaziun averta.
- Admess èn tut ils formats pratitgads en l’art contemporan (exposiziun individuala u collectiva, exposiziun tematica, projects performativs ed installativs, furmas maschadadas etc.).
- Inoltrar pon ins in project che vegn sviluppà da nov e che vegn concepì specificamain per il Pavigliun svizzer.
Per tgi?
- La publicaziun sa drizza a las artistas ed als artists ed a las curaturas ed als curaturs che han ina relaziun cun la Svizra (vesair Criteris da selecziun)
- Sa participar pon tant persunas singulas sco era teams e collectivs.
Criteris da selecziun
- Il project empermetta ina qualitad excepziunala en l’occupaziun cun ina tematica relevanta.
- Las participantas ed ils participants han ina clera relaziun cun la Svizra: in domicil permanent en Svizra, il center da lavur en Svizra, il pass svizzer u la preschientscha artistica regulara ad occurrenzas relevantas en Svizra.
- Sch’in collectiv inoltrescha in project, sto la maioritad da las persunas participadas avair ina clera relaziun cun la Svizra (vesair sura).
- Sch’in collectiv inoltrescha in project, fan tut las persunas principalas participadas part activamain da l’emprima fasa da la candidatura (vesair Procedura e process da decisiun).
- Las cumpetenzas e las capacitads tematicas ed organisatoricas per realisar il project èn avant maun.
Criteris d’exclusiun
- Exclus èn persunas singulas, teams u collectivs artistics u curatorics che han gia realisà ina contribuziun en il Pavigliun svizzer per las Biennalas da Venezia.
- La(s) persuna(s) che curatescha(n) na dastga(n) betg esser identica(s) cun l’artista/l’artist u las artistas/ils artists proponids.
- La curatura u il curatur na dastga betg avair ina relaziun da fatschenta orientada ad in gudogn cun l’artista/l’artist u las artistas/ils artists proponids, surtut betg cun ina gallaria commerziala.
- Exclusas èn retrospectivas.
- Exclus èn projects che han ina relaziun cun la Svizra sulettamain pervia dal tema elavurà.
Contribuziun finanziala
- Pro Helvetia metta a disposiziun in budget da CHF 250’000 per realisar il project.
- Sch’il project basegna ina finanziaziun supplementara, sto il team nominà s’occupar dal fundraising.
- La participaziun a l’emprima fasa da candidatura na vegn betg indemnisada. La lavur vi dals projects da la shortlist incl. la preschentaziun dal project vegn pajada cun ina pauschala da mintgamai CHF 1’500, plus eventualas spesas (vesair Infurmaziuns supplementaras).
Cuntegn da la dumonda
Las candidatas ed ils candidats inoltreschan a moda digitala in concept/dossier da max. quatter paginas A4 (PDF). Quel sto cuntegnair ils suandants elements:
- La descripziun dal project proponì per il Pavigliun svizzer ed ina visualisaziun en furma da skizza.
- L’explicaziun da l’avischinaziun artistica e curatorica.
- Sche la dumonda vegn inoltrada da curaturas u curaturs, èsi d’agiuntar al concept curatoric la glista da las artistas e dals artists participads.
- La descripziun da la collavuraziun tranter las artistas/ils artists e las curaturas/ils curaturs.
- L’argumentaziun pertge che la contribuziun proponida è adattada resp. relevanta per il Pavigliun svizzer a la 61avla Exposiziun d’art internaziunala – La Biennale di Venezia 2026.
- Curts curs da la vita (incl. weblinks) da tut las persunas participadas activamain al project.
- In budget (sch’il project basegna meds supplementars era in plan da finanziaziun).
Procedura e process da decisiun
- Emprima fasa: candidatura cun in concept/dossier (vesair Cuntegn da la dumonda)
Las dumondas en scrit ston vegnir inoltradas a Pro Helvetia fin ils 30 da settember 2024. Dumondas generalas davart la publicaziun pon vegnir tramessas fin ils 28 da fanadur 2024 a l’adressa biennials@prohelvetia.ch. A questas dumondas respunda Pro Helvetia fin ils 12 d’avust 2024. A basa dals criteris da selecziun menziunads sura examinescha Pro Helvetia en in emprim pass tut las candidaturas inoltradas a termin. Silsuenter tscherna ina giuria ina shortlist per la segunda fasa. - Segunda fasa: shortlist e preschentaziun dal project per la giuria
Ils teams da project da la shortlist vegnan envidads da preschentar lur propostas a la sedia principala da Pro Helvetia a Turitg (termin: favrer 2025). Questa preschentaziun duai sa basar surtut sin l’emprim concept/dossier. Igl è pussaivel da duvrar differents meds per visualisar il project. La gronda part dal team sto esser preschenta a la preschentaziun. Commembras e commembers dal team che vivan geograficamain lunsch davent pon era participar via video-call. - Proposta da la giuria per mauns da la direcziun da Pro Helvetia
La giuria da la Biennala concluda il process cun tscherner in project ch’ella recumonda a la direcziun da Pro Helvetia per la nominaziun. - Nominaziun dal team da project per la contribuziun svizra a la 61avla Exposiziun d’art internaziunala – La Biennale di Venezia 2026
La direcziun da Pro Helvetia decida davart la nominaziun. Pro Helvetia infurmescha la publicitad il mars 2025 davart la contribuziun nominada per la Biennala d’art 2026.
Datas e termins
Las datas da la 61avla Exposiziun d’art internaziunala – La Biennale di Venezia 2026 n’èn il mument da questa publicaziun anc betg enconuschentas. L’exposiziun ha per regla lieu durant set mais, da la primavaira fin l’atun (ca. avrigl fin november 2026).
| Publicaziun uffiziala | 1. da fanadur 2024 |
| Termin per las candidaturas da l’emprima fasa | 30 da settember 2024 |
| Infurmaziun da las persunas candidatas/invit a la preschentaziun | december 2024 |
| Preschentaziun da las candidaturas da la segunda fasa davant la giuria | favrer 2025 |
| Infurmaziun dals teams da la segunda fasa | mars 2025 |
| Communicaziun publica da la nominaziun tras Pro Helvetia | mars 2025 |
Infurmaziuns supplementaras e FAQ
- Davart la cumposiziun da la giuria vegn infurmà pli tard.
- La glista da las candidaturas inoltradas e la shortlist da las persunas e dals projects da la segunda fasa na vegnan betg publitgadas.
- La participaziun a l’emprima fasa da candidatura na vegn betg indemnisada.
- Las persunas candidatas da l’emprima fasa vegnan infurmadas per e-mail, sch’ellas vegnan envidadas a la segunda fasa (shortlist).
- Las persunas candidatas da la segunda fasa (shortlist) vegnan infurmadas per telefon e per e-mail davart l’evaluaziun da lur project tras la giuria.
- Teams che vegnan envidads per la shortlist incl. la preschentaziun dal project survegnan in’indemnisaziun pauschala da mintgamai CHF 1’500, plus spesas per ils custs da viadi en connex cun la preschentaziun a Turitg, quai tenor cunvegna preliminara cun Pro Helvetia.
Candidatura
Las dumondas en scrit ston vegnir inoltradas a Pro Helvetia fin ils 30 da settember 2024.
