Retrospectivas e prospectivas: las etappas da CCS On Tour

Centre culturel suisse Paris, Arts represchentativs, Arts visuals, Design, Litteratura, Musica

Il Centre culturel suisse (CCS), dapi sia avertura l’onn 1985 domicilià en il center dal quartier Marais a Paris, vegn renovà cumplettamain dapi l’onn 2022. Durant questas lavurs resta il CCS però activ cun in program artistic multidisciplinar: En il rom dal project ambulant «On Tour» banduna el las atgnas localitads e realisescha events en tut la Frantscha. L’atun 2025 avra il CCS puspè sias portas.

Il Centre culturel suisse è sa deditgà d’augmentar l’enconuschientscha d’ina lavur artistica svizra contemporana ed averta al mund, da render pli grond l’effect d’artistas e d’artists svizzers e da promover il barat tranter la scena d’art svizra e franzosa. 

Las etappas «On Tour» en survista:

Settember fin december 2024:
CCS on Tour a Paris

Grazia a sia rait preziusa da partenaris locals è il Centre culturel suisse puspè preschent sin las tribunas da Paris l’atun 2024: Artistas ed artists svizzers sa mussan ad events da highlight sco a chaschun da la Paris Design Week, Les Inaccoutumés automne 24, la Swiss Dance Week, il Festival d’Automne sco er a chaschun da la Performissima.

an illustration of a blushed face
© Rebecca Solaris

10 fin 26 da matg 2024:
CCS On Tour a Metz

L’ultima etappa da ses «Tour de France» ha manà il CCS a Metz. Il program è stà ina part dal «Passages Transfestival», che persequitescha – sco il CCS sez – in concept transdisciplinar cun la finamira da promover la lavur artistica contemporana. Il medem mument ha il CCS profità da l’occasiun da sviluppar in program cuminaivel cun il festival tudestg-franzos dals arts figurativs «Festival Perspectives» da Saarbrücken e cun il festival internaziunal per art digital «Constellations de Metz» a Metz. Las suandantas ulteriuras instituziuns èn stadas involvidas: il 49 Nord 6 Est – Frac Lorraine, il Centre Pompidou-Metz, il Centre d’art contemporain – la synagogue de Delme ed il teater NEST.

A person dressed all in white in a white setting, comparing the whiteness of their teeth to different shades of white.
Davide-Christelle Sanvee © CCS On Tour Metz – Valentin Duciel
A musician performing on stage, lit by blue and yellow spotlights
Sami Galbi © CCS On Tour Metz – Valentin Duciel

7 da mars fin 5 d’avrigl 2024:
Il CCS sco giast tar Les Inaccoutumés printemps 24

A chaschun da ses festival che ha lieu duas giadas l’onn ha il teater La Ménagerie de verre envidà il festival Belluard Bollwerk da Friburg ed il CCS d’inventar in program captivant cuminaivel. Amez la primavaira da Paris èn sa preschentads al public durant 5 emnas 15 events svizzers e franzos al cunfin tranter saut, art visual, concert e performanza.

30 da settember fin 15 d’october 2023: CCS On Tour a Bordeaux

Per la quarta etappa da ses «Tour de France» è il CCS stà giast tar il FAB, il Festival International des Arts de Bordeaux Métropole. Durant duas emnas è vegnida celebrada la lavur artistica svizra contemporana en sias furmas las pli differentas. Ensemen cun la Scène nationale Carré-Colonnes, l’arc en rêve centre d’architecture, il Frac Nouvelle-Aquitaine MÉCA, il Capc Musée d’art contemporain de Bordeaux, la Manufacture CDCN e Le Rocher de Palmer.

3 performers pulling an improvised boat along a street
Collectif Ouinch Ouinch © CCS On Tour Bordeaux – Valentin Duciel
A graphic poster outside with white arrows on black for CCS on tour
© CCS On Tour Bordeaux – Valentin Duciel

23 fin 26 d’avust 2023:
Il CCS al Festival International de Théâtre de Rue d’Aurillac

Perspectiva svizra a chaschun dal festival da teater da via ad Aurillac, tar il qual tut sa tractava da la lavur artistica en il spazi public. Il CCS ha preschentà ina seria d’objects d’art, ch’èn vegnids creads dadens e dadora, al lieu sez sco er en spazis urbans u natirals – pia ina lavur artistica svizra ch’è sa deliberada d’etichettaziuns e da lieus da represchentaziun tradiziunals.

4 fin 14 da matg 2023:
CCS On Tour a Rennes

La terza etappa è sa deditgada a la lavur artistica svizra en ils secturs gieus da video, litteratura, performanzas, arts scenics ed arts visuals ch’èn vegnids preschentads en differentas instituziuns da cultura a Rennes. Tar quellas tutgan il Frac Bretagne, il Théâtre National de Bretagne, La Criée, 40mcube, il Théâtre de Poche Hédé-Bazouges, il Théâtre L’Aire Libre, il Musée des beaux-arts de Rennes e la Maison de la Poésie de Rennes.

A group of people performing on the edge of a rooftop, photographed from below
La horde © CCS On tour à Rennes – Valentin Duciel
A performer on a stage outside in a fishnet dress holding a pink and a blue feather in the air
Nils Amadeus Lange © CCS On tour à Rennes – Valentin Duciel

12 da schaner fin 12 da favrer 2023:
Il CCS a la Biennale Internationale des Arts du Cirque a Marseille

A chaschun da la biennala internaziunala da l’art dal circus a Marseille ed en las regiuns vischinas ha il CCS purschì in line-up dad otg artistas ed artists da circus che han pudì brigliar davant in public internaziunal da profis. 

18 fin 26 da schaner 2023:
CCS On Tour a Lyon

En la segunda etappa è il CCS sa fermà anc ina giada a Lyon. Sin il program stevan exposiziuns, shows, concerts, performanzas, prelecziuns ed inscunters litterars en partenadi cun instituziuns localas da cultura, tranter quellas la BF15, il TNG, las SUBS, il Théâtre de la Croix-Rousse, il Théâtre des Clochards Célestes, il Périscope, l’Archipel e la Villa Gillet.

a scenic installation tapestries and pillows with typographic prints
Johana Blanc © CCS On tour à Lyon – Valentin Duciel

18 fin 26 da november 2022:
CCS On Tour a Dunkerque

Performanzas, exposiziuns, shows, inscunters ed installaziuns en tut la citad han dà il tact da questa emprima etappa da CCS On Tour, che ha pudì vegnir realisada grazia al partenadi cun instituziuns localas sco il Frac Grand Large, il LAAC, il Bateau Feu Scène Nationale, la tribuna per musica actuala Les 4 Ecluses sco er Le Château Coquelle. 

An art installation or performance of a group of people standing in front of an industrial building, each wearing a part of a statue's body as a costume.
Julie Monot © CCS On Tour Dunkerque – Valentin Duciel
A dancer performing on a large black plastic circle
Marie-Caroline Hominal © CCS On Tour Dunkerque – Valentin Duciel

October 2022 fin matg 2023:
Ciclus da discurs davart il design da grafica

In ciclus da discurs concernent il tema dal design da grafica en cooperaziun cun l’École nationale supérieure des Arts Décoratifs, tar il qual artistas, grafichers, designras e scenografs èn stads envidads da dar ina invista en lur ideas e reflexiuns.

14 da settember 2022:
CCS On Tour – saira da cumenzament a Lyon

A chaschun da l’avertura da la Biennale d’art contemporain de Lyon ed il medem mument sco cumenzament da la CCS On Tour ha il consulat general svizzer a Lyon organisà in tur artistic tras la residenza e tras l’iert dal consulat.

A large inflated hand in a garden raising the index finger in the air
© CCS On Tour au Consulat général de Suisse à Lyon – Aurélien Dadié

5 da favrer fin 5 da mars 2022:
Festival Tschüüss en il CCS Paris

Avant che cumenzar cun las lavurs da renovaziun ha il CCS envidà il public in’ultima giada en sias localitads per celebrar la lavur artistica svizra en tut sias furmas cun il festival Tschüüss. 40 artistas ed artists han mussà durant 30 dis in program cun projecziuns da film, concerts, represchentaziuns, installaziuns, performanzas, sets da DJ ed ina fin d’emna festiva da finiziun. 

Photograph of two dressed up performers in blueish tint in front of a pink background
A normal working day © CCS Paris

CCS On Tour

Las singulas etappas da CCS On Tour pudais Vus persequitar en detagl sin la pagina d’internet dal Centre culturel suisse. 

Suenter ina concurrenza da l’Uffizi federal per edifizis e logistica (UFEL) è vegnì tschernì – en collavuraziun cun Pro Helvetia – in project ch’è resortì da la cooperaziun franzosa-svizra dals biros d’architectura Thomas Raynaud (Paris) e Truwant + Rodet + (Basilea). 

L’atun 2025 avra il CCS puspè sias portas.